Bretoiera informatika arloan hedatzeko helburua duen An Drouizig elkarteko lehendakaria da 2015etik. Software aplikazio ugariren itzulpenean parte hartu du, esate baterako Firefox eta Steredenn, Flipon, Minecraft eta beste bideo-joko batzuenetan. 2021ean aurkeztu zen bretoi hizkuntzaren aditz konjugatzaile baten garapenean parte hartu zuen.

Petra C’hoari Ganit? izeneko bideo-jokoei buruzko podcastaren aurkezlea da. Maiztasun handiarekin Twitchen ibiltzen da bretoieraz zuzenekoak egiten. Hilabetean behin bideo-jokoei buruzko artikuluak idazten ditu Ya! astekarian eta teknologia berrien inguruko irratsaio motza grabatzen du Radio Naoned-en.

Bretoi hizkuntzaren historia eta egoera bideo-jokoen arloan

Bretoiera orain dela asko iritsi zen teknologia berrietara, baina oraintxe heltzen ari da bideo-jokoen arlora. Gaur egun hainbat bideo-jokotara jokatu daiteke bretoieraz, bai open-source, bai komertzialak. Gainera, gero eta handiagoa den komunitatea dago Discord, Twitch eta beste joko plataformetan. Hizkuntzaren ofizialtasun ezak zaildu egiten du honen presentzia bideo-jokoen arloan, eta horregatik, bretoiera dagoen egoerara iritsi da aktibisten eta jende gogotsuaren lan boluntarioari esker.