RBorn Games 2019an sortutako bideo-joko sortzaile taldea da. Ethan Reyesek, Aitor Artetxek, Eder Gartziak, Ismael Molanok eta Unai Aranagak osatzen dute taldea eta Tartanga eskolan ezagutu ziren. 2021ean PlayStation Talents programaren baitan garatutako The Five Covens bideo-jokoa argitaratu dute PlayStation plataforman.
Zuen ustez, zer da ezinbestekoa gaur egun talde hasiberria bideo-jokoen garapenaren munduan sartzeko?
Garrantzi handiko hainbat faktore daude industria honetan sartzeko. Alde batetik lan giro egokia lortu behar da. Taldelana oso garrantzitsua da baita, eta proiektuan zehar aktiboki jardun behar duzu ideiak amankomunean ipintzen, besteon lanari feedback-a ematen eta akatsak zuzentzen. Horretarako elkarrekiko konfidantza itzela eduki behar dugu. Beste alde batetik, denbora asko inbertitu behar izan dugu proiektua aurrera eramateko. Epe txikiko lanak egiten jarraitzeko malgutasuna izan behar dugu sarritan, beste pertsona batzuen ordutegira moldatu behar zarelako.
Batez ere, asko mugitzeko beharra dago. Industria honetan, behintzat estatu mailan, lan aukera oso gutxi daude, oro har, esperientziadun taldeentzako direnak. Beraz hasieratik hasteko, agertu daitezkeen aukera guztiak aprobetxatu behar dira.
Orain dela gutxi ikasketak amaitu eta sektorera iritsi zaretela jakinda, nola ikusten duzue zuen etorkizuna bideo-jokoetan?
Egia esanda, ez dugu etorkizunerako planik. Badakigu industria honetan jarraitzeko oso garrantzitsua dela kontaktu ugari edukitzea gero hortatik lanak lortzeko.
Baina errealitatea da Espainia mailan industria hau ez dela oso garatuta aurkitzen, eta horregatik, bideo-jokoen inguruan lan egin nahi ezkero atzerrira joateko prest egon behar zara.
Esan dezakegu esperientziarik gabe sartzea ez dela erraza, baina behin industria barruan egonda eta erreferentzia onak edukita, langile ona izateagatik, lanak zu bilatzen zaitu.
Zeintzuk dira euskarak bideo-jokoen baitan dituen erronkak?
Bideo-jokoak garatzeak hainbat gauza suposatzen ditu, baina jokoa dirurik gabe ekoiztea tamaina handiko esfortzua eta sakrifizioa izan daiteke. Noiz kobratuko dugun, edota azkena izan daitekeen beldurrarekin egotea, oso gogorra da. Dirulaguntzarik gabe ia inork ez zituen jokoak garatuko. Azkenean, talde txikiek edo hasiberriek, bideo-jokoak garatzeko dirua eta jakitunen aholkua behar dute, eta ondorioz, edozein joko edozein arloren inguruan egiteko prest egongo dira. Eusko Jaurlaritzak ez badu laguntzarik eskaintzen, inork ez zituen euskaraz egingo era iraunkorrean (nahiz eta momentu puntualetan bizpahiru argitaratu daitezkeen).
Horretaz aparte, jokoak potentzial handiagoa erakusten badu eta europar mailan argitaratu nahi ezkero (Steam-en edo edozein kontsoletan), hizkuntzen filtroak pasatu behar dira, bost hizkuntzetara itzulita ezinbestean. Beraz, ekoizpen denborak kontuan hartuta, euskaratzeak garapenaren denbora asko hartzen du.
Aurrekontu muga izango ez bazenute, zer nolako bideo-jokoa garatu nahiko zenukete euskaraz jokatzeko?
Ez dugu pentsatu. Bideo-joko batek zer nolako bidea hartuko duen aukeratzeko momentua aurreproduzkio garaian da. Guri bideo-joko mota asko gustatzen zaizkigu, 3D/2D plataformak, tiro jokoak, online… Baina mota ezberdineko jokoak garatzeko hauek dituzten zailtasunak kontuan izan behar dira.
Aurrekontu mugarik ez edukitzeak gure proiektua garatzeko askatasuna ematen digu, eta ez bezero batek markatzen dituen pautak jarraitu behar izatea, nahiz eta ez gustatu.
Askatasun honen barruan euskarara itzultzeko aukera egon daiteke, baina gure eskura balego, hizkuntzak ez luke markatuko bideo-jokoaren bidea, jokoak izango lukeen gehigarria izango litzateke.
RBorn Games-eko ordezkarien Aitor Artetxe eta Ethan Reyesen profil osoa, hemen